REDDI

REDDI

dicebantur proprie, quae prosecta Diis porriciebantur. Unde de Pinariis, qui in sacrificio Herculis ad tempus praesto non fuerant, venerantque, ἐσπλαγχνευμένων ἤδη τῶ ἱερῶν, ut ait Dionysius, h. e. extis iam adesis, ut vertit Livius, l. 1. c. 7. Servius exponit, Extis iam redditis. Nempe, ritu a Promethoe acceptô, partem hostiae in ignem conicere soliti sunt Veteres, cum sacrificabant, partem ad suum victum abuti; quum anteâ tota hostiarum et illibata viscera igne consumerentur. Partem igitur extorum prosicatam arae superimponebant et Diis adolebant seu in ignem inferebant (quod ἀπάρχεςθαι ἐμπύρων Graecidixêre) partem vescebantur, qui sacrificio intererant. Et exta quidem prius mandebant, quam reliquam carnem. Vide supra in voce Prosiciae. Idem ad illud l. 6. Aen. v. 252.

Et solida imponunt taurorum viscera flammis:

Solida, inquit, viscera holocaustum significant: quod detractis extis arae superimponebantur, quae nonnumquam abluta, elixa etiam ipsa reddebantur. Ubi indigitat, in holocaustis carnes immolatarum hostiarum concremari solitas tantûm, non etiam exta. Nam viscera sunt proprie, quidquid inter ossa et cutem est. Interdum tamen etiam exta una cum reliquis carnibus arae superimponi et comburi consuevisse. Idem alibi, Reddi exta dicebantur, cum probata (Barthius mavult prolata, tam enim de adversis,quam prosperis, cmmune verbum) et elixa arae superponebantur. Sed et Sueton. in Aug. c. 1. Cum rem divinam Marti faceret, nuntiatâ repente hostis incursione semicruda exta rapta focô prosecun. atque ita proelium ingressus victor rediit. Decretum etiam publicum extabat, quô cavebatur, ut in posterum quoque simili modô exta Marti redderentur, reliquiaeque ad Octavios referrentur. Sic exta reddi et prosequi idem. Vide supra in voce Prosiciae. Lutatius ad Statium, Thebaid. l. 4. v 464. verba Aruspicinae sive Extispicii hôc ordine disponit: Primo est sanguinem libare, deinde immolare, tertio reddere, quarto litare. Rationem vocis hanc dat Barthius: Reddere dicebatur (Sacerdos) quia debita flammis ipse sumpserat, itaque

ferali illi igni suum quod erat restituit, Animadversion. ad Poetam praefatum, l. cit. v. 466. At Reddi Flumina, dicuntur Latinis, quae emergunt, postquam aliquandiu latuerunt. Plin. l. 5. c. 29. Marsyas ibi redditur, ortus, ac paulo mox conditas, ubi certavit tibiarum cantu cum Apolline Aulocrenis. Fluvius enim hic apud Celaenas oritur ex monte, mox conditur: demde emergit ac redditur; paulo post iterum conditur, ubi in Maeandrum cadit. Vide Salmas. ad Solin. p. 827. uti de iu, quae iniustô bellô capta, possessionibus reddendis supra in Capta; de pecunia mutuatitia a debitoribus redditâ, infra phrasi Rescripti ad flagrum.